Desque’n 1974 la Organización de les Naciones Xuníes aprobase la Resolución 3263 (XXIX), afalando l’establecimientu nel Oriente Mediu d’una zona llibre d’armamentu nuclear y d’otres armes de desaniciu, foron abondes les ocasiones nes que les Naciones Xuníes y otros muérganos internacionales atesteriaron nel mesmu llamáu… y otres tantes les que fracasaron nel so enfotu. La cabera, en 2010, cuando la Conferencia de Revisión del Tratáu “Non Proliferation Treatment” (NPT, pola sigla n’inglés) contra’l medru nuclear entainó la convocatoria d’una conferencia en 2012 pa poner en marcha’l procesu y l’entamu foi, una vez más, boicoteáu por Israel y los Estaos Xuníos.
La declaración del Oriente Mediu como zona llibre d’armamentu nuclear implicaría la xuntura d’Israel al TNP en calidá d’estáu non nuclear y l’abellugu de toes les sos instalaciones baxo’l control de l’Axencia Internacional de la Enerxía Atómico (AIEA), lo mesmo que ya ficieren el restu de los estaos de la rexón.
Si Israel abriera les sos instalaciones a la vixilancia de los inspectores de la AIEA, el Conseyu de Seguridá de la Organización de les Naciones Xuníes (CS) podría conocer la importancia real del peligru qu’esos arsenales supuestamente secretos representen y taría obligáu a tomar les midíes afayadizes pa eliminar l’amenaza que planea sobre la feble paz de la zona.
Sicasí nada nun ye como debería. Cola so fata ya interesada irresponsabilidá, el Conseyu de Seguridá dexa coles manes llibres a Israel p’aumentar la so potencia nuclear fuera de cualesquier control, astiénse d’apurar el cumplimientu de les sos propies resoluciones y revela la so incapacidá pa esconxurar una catástrofe de consecuencies fáciles de prever.
Pero esta pasividá irresponsable y los turbios intereses que la determinen nun tienen que ser pilancos qu’impidan a la ciudadanía tomar nes sos manes la guarda de la paz y reclamar al Conseyu de Seguridá, con voz plural y unánime, que tome les midíes afayadízes pa obligar a Israel a abrir los sos arsenales a la vixilancia de l’AIEA.
 |
 |
