O 18 de setiembre de 2009 a Conferenzia Cheneral de l’Achenzia Internazional d’a Enerchía Atomica (d’aquí enta debán AIEA) aprebó a Resoluzión GC (53) / RES / 17 relatiba á ras capazidaz nucleyars d’Israel en a que, dimpués d’espresar-se a procupazión por a menaza que a proliferazión d’armas nucleyars suposa ta l’Orién Prosimo, entima á Israel á firmar o Tratato de No Proliferazión d’Armas Nucleyars (d’aquí enta debán, TNP) e sozmeter toz os suyos despositibos atomicos á ra salbaguarda completa de l’AIEA.
Como consecuenzia d’ista resoluzión, a Mesa de Gubernadors de l’AIEA debatió, en a suya reunión de chunio de 2010, a custión d’as capazidaz nucleyars d’Israel dimpués d’aber nimbiato ro Secretaire Cheneral una carta á os Estatos miembros en abril de 2010 demandando ros suyos puntos de bista e alportazions á o respeutibe. Igual como en anteriors ocasions, tamién en ista o gubierno israelí se refusó de cooperar con l’AIEA e reiteró o suyo refús á firmar o TNP.
Dato que l’establimiento en l’Orien Prosimo d’una zona libre d’armas nucleyars e d’atrás armas de destruzión masiba suposarba una contrebuzión dezisiba ta ra paz en a rechión, e dato que o refús d’Israel á firmar o TNP e sozmeter totas as suyas capazidaz e dispositibos nucleyars á o pleno escrutinio de l’AIEA constituye una clara menaza ta ra paz en o sentito d’o cabo VII d’a Carta d’as Nazions Unitas, os abaxo firmantes demandamos:
1. Que o Consello de Seguridá d’a ONU reclame de l’Estato d’Israel a firma d’o TNP e o sozmetimiento pleno á l’escrutinio de l’AIEA de totas as suyas istalazions e despositibos atomicos, cara ta l’establimiento en l’Orién Prosimo d’una zona libre d’armas nucleyars e d’atras armas de destruzión masiba.
2. Que ta ro causo de no fer-lo pas boluntariamén, o Consello de Seguridá adote cuantas midas fuesen d’amenister, á l’emparo d’os arts. 41 e 42 d’a Carta d’as NN.UU., ta lograr os ochetibos endicatos.
